Eguesibarko Udalak hiru prestakuntza-programa sustatu ditu tokiko merkataritzaren lehiakortasuna hobetzeko

Eguesibarko Udaleko Garapen Ekonomikoko Arloak, Eguesibarko Merkatarien Elkartearekin lankidetzan, sare sozialei, bideomarketinari eta adimen artifizialari buruzko hiru prestakuntza-ziklo antolatu ditu. MKcomunicación komunikazio-aholkularitzak ematen dituen prestakuntzak irailetik azarora bitartean egiten dira Sarriguren Kiroldegian.

Eguesibarko Udalak, Garapen Ekonomikoko Arloaren bidez eta Eguesibarko Merkatarien Elkartearekin lankidetzan, prestakuntza-programa bat jarri du abian, tokiko merkataritzaren gaitasun digitalak hobetzeko eta komunikazio, sustapen eta enpresa-kudeaketarako tresna berriak erabiltzea errazteko.

Ekimenak sei orduko hiru prestakuntza-ziklo hartzen ditu barne, bakoitza lau saiotan banatuta. Ikuspegi praktikoa dute, eta merkataritza-establezimenduen beharretara egokituta daude.

Saio guztiak Sarriguren Kiroldegiko D aretoan egiten dira, 20:30etik 22:00etara, eta MKcomunicación komunikazio-aholkularitzak ematen ditu.

Ventas 360: sare sozialak, Google eta WhatsApp Business

«Ventas 360: Impulsa tu comercio con Google, WhatsApp y Redes Sociales» prestakuntza-zikloa irailaren 16an, 17an, 22an eta 23an egin zen.

Prestakuntzan, kanal digitalek establezimenduen ikusgarritasuna hobetzeko, bezeroekiko harremana sendotzeko eta salmentak sustatzeko eskaintzen dituzten aukerak landu ziren.

Landutako edukien artean daude sare sozialen kudeaketa profesionala, Googleko Enpresa Profilaren optimizazioa, WhatsApp Businessen erabilera komertziala eta negozio bakoitzera egokitutako marketin digitaleko plan bat prestatzea.

Bideomarketina: merkataritza sustatzeko edukiak sortzea eta editatzea

Bigarren zikloa, «Creación de contenido para negocios: crea y edita contenidos que promocionen tu marca», urriaren 6an, 8an, 14an eta 15ean egiten da.

Tailerraren ardatza sare sozialetarako ikus-entzunezko edukiak sortzea da, bereziki Instagramerako eta Facebookerako.

Ariketa praktikoen bidez, parte-hartzaileek beren produktu eta zerbitzuen bideoak grabatzen eta editatzen, reelak sortzen eta argitalpen digitalak hobetzen ikasten dute.

Prestakuntzan, halaber, edukien plangintza, argitaratzeko ordutegiak, estatistiken interpretazioa eta bideoekin batera argitaratzen diren testuen idazketa lantzen dira.

Adimen artifiziala negozioen kudeaketan eta komunikazioan aplikatzea

Hirugarren zikloa, «Inteligencia artificial para mejorar la gestión y la comunicación de tu negocio», azaroaren 4an, 5ean, 10ean eta 12an egingo da.

Saioetan, ChatGPT eta Gemini bezalako adimen artifizialeko tresnen erabilerari buruzko sarrera praktikoa eskainiko da, establezimenduen eguneroko zereginetan izan ditzaketen aplikazioei arreta berezia eskainiz.

Parte-hartzaileek tresna horietarako jarraibide eraginkorrak prestatzen, merkataritza-mezuak idazten, bezeroen iritziak kudeatzen, produktuen deskribapenak sortzen eta adimen artifizialaren eta Canvaren bidez sustapen-materialak diseinatzen ikasiko dute.

Era berean, inbentarioaren kudeaketarekin, merkataritza-plangintzarekin eta teknologia horien erabilera seguru, etiko eta legalarekin lotutako aplikazioak landuko dira.

Tokiko merkataritza indartzeko prestakuntza praktikoa

Programa honen bidez, Eguesibarko Udaleko Garapen Ekonomikoko Arloak eta Eguesibarko Merkatarien Elkarteak tresna digitalak udalerriko merkataritza-sarera hurbiltzearen aldeko apustua egiten dute.

Helburua da establezimenduek beren presentzia digitala hobetzea, bezeroekiko komunikazioa optimizatzea, eduki propioak sortzea eta teknologia berriak eguneroko kudeaketan txertatzea.

Hiru zikloek metodologia praktikoa dute oinarri, parte-hartzaileek eskuratutako ezagutzak zuzenean beren negozioetan aplikatu ahal izan ditzaten. Horrela, tokiko merkataritzaren modernizazioa eta lehiakortasuna sustatu nahi dira.